التاسعة عشر
وبعد ماروحوا
وقفت أمل في البلكونة كالعادة ...بتسأل نفسها عن اللي حصل ..وتسترجع كل كلمة قالها لها
أحمد: بخ ..!!
امل اتخضت : حرام عليك ...
أحمد:اللي واخد عقلك .... أكيييد عريس انهارده؟!!
ماسمعتش يعني ..اطلع بره ولا شكل ولا زعيق ولا أي حاجة
فهل نال إعجاب سيدتي ؟؟؟
أمل: شكله كدا
أحمد:احكي احكي يامولاتي شهرزاد
أمل: انت رايق كدا ليه؟؟ وبعدين مش هحكيلك
أحمد:ليه بقى ؟؟!
أمل: عشان خضيتني
أحمد:ياسلام!!! وهى أول مرة؟؟! وبعدين انا وقفت خمس دقايق جنبك وانتي ولا انتي هنا
أمل:كنت بفكر
أحمد:في إيه ؟؟
أمل: مش عارفة عملي إيه ؟؟دا انا كنت محضرة شوية كلام عشان ارفضه واطرده بيهم ....كله راااح
أحمد بيغني :ياسلام ع الحب لما يدق بابك فجأة
أمل: حب إيه اللي انت جاي تقول عليه ؟!! يمكن مجرد إعجاب
أحمد:الإعجاب مايعملش كدا ...دا حب من أول نظرة
أمل: مافيش حاجة اسمها حب من أول نظرة
أحمد: لأ فيه ...لما يكون هو دا الشخص اللي مقدرليكي بيكون حبه في بعض الأحيان حب من أول نظرة ...وهو اللي بيعمل في الناس كدا
احكيلي بقى
وحكتله أمل على كـــــل حاجة
أحمد:يازيدي ...يازيدي !! مبروك يا حياة
أمل: أمل
أحمد:صح هو بس اللي يقولك ياحياة
أمل: بس أنا لسه ماقولتلوش
أحمد:وماله ؟ّ!! قوليله بعدين
أمل: مش عارفة يا أحمد أكمل أصلا ولا لأ
أحمد: كنتي حاسة ب إيه ساعتها ؟؟!
أمل: فرحانة ومرتاحة وحاجة غريبة بتشبه الرضا في قوته في قلبي
أحمد:يبقى خلاص ..هو دا ..وكمان دخل الباب من بيته
أمل:انت شايف كدا ؟؟
أحمد: انتي كمان شايفة كدا ...
أمل:يمكن ....
أحمد:هو انتوا اتفقتواعلى امتى قرآة الفاتحة وتلبيس الدبل ياعروسة ؟!
أمل: قبل الحفلة بيوم ...يعني الخميس اللي جاي
أحمد:انتم السابقون ... ونحن اللاحقون
أمل: ههههههههه ...تصبح على خير يالاحق
أحمد:
وانتي من أهله ياسابق
ودخلوا ناموا
وتاني يوم الصبح راحت أمل مع مامتها ...يشتروا هدوم للشبكة وغيره
واليوم اللي بعديها اشتروا الشبكة
بعد ماخلصوا قعدو في كافيه
عمر:عجبتك ؟؟
أمل: أه جدا
عمر:انتي بس تؤمري واعملك اللي انتي عايزاه
أمل: عمر؟!!
عمر:نعم؟
أمل: انت ليه بتعمل معايا كدا ؟؟
عمر: ازاي يعني ؟؟
امل: يعني من أول مرة شوفتني فيها ..وطلبتني من اهلى وكلامك كمان ...كان مش كلام واحد أول مرة يشوف واحدة لكن كلام واحد ...
عمر:كلام واحد بيحب؟!!
أمل: أيوة
عمر:طب ما أنا بحبك
أمل: من أول مرة؟؟
عمر: ماسمعتيش عن الحب من أول نظرة؟؟
بس ما اكدبش عليكي دي ماكانتش أول مرة أشوفك فيها...يعني كنت أعرفك قبل كدا
أمل استغربت : ازاي يعني ؟؟
عمر: من كتابتك
ولأننا اتقابلنا قبل كدا
أمل رجعت لاستغرابها المشوب بالخوف : واحنا اتقابلنا قبل كدا ؟؟
عمر:أيوة ....احنا كنا في نفس تيم الإنقاذ االلي كان بيساعد المكتئبين في مستشفى *****
أمل: واحنا اتقابلنا هناك ؟؟
عمر:هو التيم كان كبيرواكييد ماتعرفيش كل الناس بس كلهم كانوا يعرفوكي ...
أمل: وليه بقى؟؟
عمر:عشان ماكانش فيه أمل زيك ولا إصرار وإيمان زي اللي كان عندك....كلامك كان مختلف وطريقتك كمان في تعاملك معاهم
احنا تقريبا مااتكلمناش مع بعض هناك أكتر من مرتين وكلامنا ماكانش يتجاوز الكلمتين بس مش بالكلام بنعرف الناس ومش بالكلام بنحب
أمل:طب ليه ماقولتليش المرة اللي فاتت انك تعرفني قبل كدا
عمر: ماجتش فرصة افتح فيها الموضوع وكنت مركز ...في ازاي اقدم طلبي ليكي
أمل: عمر.. انا عايزة أقولك ....
مامتهما اللي كانتا جالستان في تربيزة جنبهم زهقوا وكانواعايزين يمشوا
فملحقتش أمل تقول اللي عايزه تقوله
في البلكونة
أمل: مش عارفة يا أحمد أقوله ازاي ؟؟...كل ما أجاي اتشجع وأقوله حاجة توقفني ...انا خايفة
أحمد: من إيه ؟؟؟
أمل: انه مايقبلش الموضوع ..ونفركش الحكاية
أحمد: لأ طبعا ...دا شكله واقع لشوشته ...وبعدين هو كمان مابيخلفش فإيه المشكلة ؟؟
ومش أنا اللي هأقولك اننا لازم نبدأ علاقة الزواج بالصراحة والصدق
أمل: ما أكييد هأقوله بس مش عارفة ازاي ؟؟
أحمد:زي ما قالك قوليله ...بصراحة ووضوح ومن غير لا لف ولا دوران
أمل:خلاص ان شاء الله أقوله بكرة بعد الشغل
أحمد:إن شاء الله
وبعد فترة من التفكيرفي مقاله ....ألهمته وقفته معها في البلكونة
إنه يكتب آخر مقال ليه في
(أنا إيه اللي وداني)
أنا إيه اللي وداني ...كلاكيت آخر مرة
خلاص أخر مقال ليا
ماتفرحوش أوي
أخر مقال ليا في باب (أنا إيه اللي وداني )
وقررت أنه مايكونش زي أي مقال كتبته ...لأنه مش(أنا إيه اللي وداني)
لكنه (يابخته اللي راح)
اللي راح للبنت اللي اتولدت لقيتها جنبي ...انتوا تعرفوها ...حكتلكوا عنها قبل كدا (قلبظ )
انا مش بناديها بـ الاسم دا إلا لما ببقى مضايق منها أو متخانق معاها
طبيعي إن الواحد يتخانق مع جارته ..صديقته ..وأخته الوحيدة ..ويرخم عليها من وقت للآخر
البنت دي مش اي حد دي امل الحياة كلها
هى اللي علمتني القوة والاصرار والوقوف بعد الفشل ...
خلتني رغم العروسات اللي انتوا قرأتوا عنهم
أشوف إن لسه فيه أحسن
خلتني أفضل محترم الجنس -اللطيف جدا- واللي شوفت منه أهوال -لاداعي لذكرها انتوا عارفين لواحدكو انا متأكد -
في وقت قصرت (ركزت )احترامي فيه على أمي
البنت اللي وقفت جنبي في وقت أصدقاء رجال تركوني فيه
بنت هتكون بكرة أحسن أم في العالم
بنت سماها اللي راح حياة ...وهى حياة فشكرا ليها
ويابخت اللي راح ليها
أحمد
نورهان لاشين
ليست هناك تعليقات:
إرسال تعليق