الحلقة الثامنة عشر
عمر:تسلم إيديكو الأكل حلو جدا
مامة أمل :ربنا يخليك ..دي أمل اللي عاملة الأكل كله
ودي طبعا كذبة بيضة من كذب الأمهات
أمل: مش كله يعني
عمر بابتسامة :تسلم إيديكي
أمل بكسوف:شكرا
وخلصوا الأكل وقعدوا في الصالون كالعادة
مامة عمر:وانتي ليه مادخلتيش طب ولا صيدلة وانتي مجموعك كبير ...كنتي هتعرفي حاجات كتيير
أمل بأدب وبثقة :نفس الحاجات اللي الباشمهندس عمر ماعرفهاش لأنه دخل هندسة
المهم إني بحب اللي بعمله ...ودا اللي هبدع فيه وأكبر فيه
عمر كمل كلامها :فعلا كلنا مثقفين في مجال وجاهلين في مجال تاني ...المهم نكون فاهمين الثقافة اللي نعرفها وعشان نفهمها لازم نكون بنحبها
حست أمل بإحساس غريب جواها ماكنتش تعرفه لكن بجانبه كان فيه الفرح
عمر كمل كلامه: وانتي ليه دخلتي إعلام ؟
أمل: لأني بحب الكتابة وإعلام بتخدم رسالتي في الحياة
عمر:وإيه رسالتك ؟؟
أمل :إني أرضي ربنا باني اكون راضية ومرتاحة وأساعد الناس يحسنوا حياتهم ويفهموها بنفسهم وبإيديهم
مامة عمر:أوعي تكوني زعلتي مني أنا بس كنت بسأل ليه اخترتيها
أمل: لأ أبدا أنا عارفة إن حضرتك ماتقصوديش حاجة
عمر:وبعدين لو كنتي دخلتي صيدلة ماكوناش لقينا اللي تبهدلنا كل اسبوع
أمل: انا مش ببهدل حد أنا بس بقول نماذج حقيقة وهى تستحق البهدلة
وبعدين أحمد بيطلع فينا اللي بأعمله أول بأول
عمر: انتي تعرفيه؟؟
أمل: من وانا عندي سنة ...هو جارنا
وقعدوا يتكلموا في حاجات كتير
وفي وسطها
مامة أمل: أنا مايهمنيش غير أني أشوف ولاد أمل وافرح بيهم
مامة عمر: وأنا كل همي أشيل ولاد عمر بإيدي وأربيهم
اتغير وش أمل بس عمر فضل زي ماهو مبتسم ومعجب
وزي أي أم أخدت مامت أمل مامت عمروباباه وزوجها عشان يشموا الهوا
وفضلت أمل مع عمر
عمر بدأ الكلام ولسه نظرته مااتغيرتش
نفس النظرة من اول مادخل بيتهم نظرة الاعجاب والفرح ...المهم إنها نظرة بدأ بتسلل شعورها لأمل
عمر: انا متأكد إنك عارفةانهم سايبنا ليه؟؟
أمل: أكيييد ...بس ليه متأكد قوي كدا ؟؟!
عمر: عشان شكلك قوية وذكية وبتفهمي بسرعة
أمل: لحقت تعرفني ؟؟
عمر: مش عارف هتشوفيها ميزة ولا عيب بس انا بفهم الناس بسرعة ...وبعدين انابقرأ كل أسبوع مقالك وأيحد ممكن يعرف شخصيتك منه
أمل: مش كل الناس ممكن تفهم الشخصية من مقال ...وبالنسبة إنها ميزة ولا عيب فهي ممكن في مرة تظبط ومرة لأ
عمر: بس أنا صح دلوقتي ؟؟
أمل: صح
عمر:أنا عمري ماشوفت بنت زيك ذكية وجميلة ولبقة ومرحة ومريحة
أمل:مريحة؟؟؟
عمر: أيوة ..الكلام معاكي سهل مش خايف ..ومش بدقق في كل كلمة ليمكن تفهميها غلط
أمل:يسعدني إني مريحة
عمر: هههههه ماقولتيش انتي شايفاني ازاي؟؟!
أمل:أممم ذكي ولبق و.......مريح
عمر:مريح؟؟!! ههههه
أمل: أها سهل الكلام معاك والمواضيع سهل إنها تيجي لأنك مثقف في أكتر من ناحية
عمر :إذا احنا مرتاحين
أمل:هههه أيوة
في كل مرة بترتاح فيهاأمل ليه كانت بتخاف أنه يعجبها وأنها ماتقدرش تقول لأ لو طلبها ...بتخاف تخسره لما تقوله إنها مش هتكون أم
فقررت ماتستناش ...ماتستناش ذلك اليوم
وقررت تقوله دلوقتي وقبل أي حاجة ماتحصل
أمل: باشمهندس عمر ؟
عمر: نعم؟؟
أمل: يعني مامتك قالت إنها نفسها تشوف أولادك افرض ان ماجالكش أولاد هتعمل إيه؟؟!
عمر :ربنا قال (يهب لمن يشاء إناثا ويهب لمن يشاء الذكور أو يزوجهم ذكرانا وإناثا ويجعل من يشاء عقيما إنه عليم قدير )
صدق الله العظيم
يعني لو ماكونتش بجيب أولاد فدا بمشيئة ربنا ومابنفعش اني اعترض عليها ومافيش اللي يخلني اعترض أصلا ...ربنا هيديني الأحسن
وأكيييد هأعمل اللي أقدر عليه بس لو دا نصيبي خلاص
أمل:دا لوكان العيب فيك بس لو كان فيها هتدورعلى واحدة تانية !
عمر قام وقعد على الكرسي اللي جنبها وفي عينيه نفس النظرة
عمر: وادور ليه على غيرها وهى اللي أنا عايزها ؟؟
بدأقلبها يدق بسرعة واتوترت ودي مش عواديها انها تتوتر
نزلت وشها في الأرض وقبل ماتقول أي كلمة
عمر: بس ياريت هى اللي تقبل بواحد مابيخلفش
اتخضت أمل وبصتله وكأنها بتقوله :قول تاني كدا
عمر:إذا انتي عايزة أولاد؟؟؟
اتخضت أمل تاني رغم شعورها بالفرح والاضطراب ورغم إن اللي ظهر على وشها نوع من الرضا والفرح .....ومن القبول
أمل: أنا عايزة أقولك....
عمر:ماتقوليش...ماتقوليش غير إنك موافقة أو لأ
أمل: بس....
عمر:من غير بس....تقبليني؟؟!!
أمل:احنا مانعرفش بعض كويس ...ودي أول مرة نشوف بعض فيها
عمر: يبقى نغير الطلب ...تسمحي تعطيني فرصة نتعرف على بعض
عمر: يبقى نغير الطلب ...تسمحي تعطيني فرصة نتعرف على بعض
امل سكتت
عمر: السكوت علامة الرضا ...مش كدا؟؟؟
أمل ضحكت وأومأتله برأسها
عمر:صدقيني انا أسعد إنسان في الدنيا
أمل مكسوفة بتحاول تداري كسوفها :هما راحوا فين كل دا؟؟
عمر:زهقتي مني؟؟؟
أمل: لأ بس قلقت عليهم
عمر: ماتخافيش ..هما كبار مش هيتوهو
أمل:ههههه
عمر:هو أنا ممكن أناديلك وأقولك حياة ؟؟!
أمل: إشمعنا؟؟
عمر: لأني كل ما أبصلك أعرف إن لسه في الحياة حاجة حلوة ...لما بتضحكي بفتكر إن الشمس هتطلع تاني بكرة ...بشوف فيكي الحياة نفسها
أمل:برده احنا لسه مانعرفش بعض كويس عشان تناديلي باسم خاص
عمر:أممم صح إذا في اليوم اللي هتسمحيلي فيه بإني أقولك ياحياة هتحييني؟؟!
أمل:أحييك؟؟
عمر: هأعرف ساعتها إنك خلاص عرفتيني وقبلتيني وبادلتيني نفس الشعور
أمل أومأت مرة أخرى وابتسمت
وهو كمان ابتسم لحياته
وجه الأهل أخيييييرا يعرفوا أخر المستجدات
ومن غير مقدمات
عمر: يا أستاذ ...لأ لأ في الحالات اللي زي دي بيقولوا ياعمي
ياعمي تسمح تقبل طلبي بإني أعرف بنت حضرتك؟؟
باباها:نعم؟؟
عمر:أخطبها يعني..
باباها: أه أكييد أنا لي الشرف
بابا عمر: اذا حضرتك موافق؟؟
باباها:أكييد
مامتهما فرحوا جدا وباركولها وهنوها
وهى كمان كانت فرحانة مع إنها لسه ماتعرفوش وماعملتش اللي كانت بتعمله في اللي قبليه ....كان مختلف عنهم كلهم
وبعد ماروحوا ....
نورهان لاشين
ليست هناك تعليقات:
إرسال تعليق